मुंबई : गत दीड वर्षांपासून तुरुंगात खितपत पडलेले राष्ट्रवादी काँग्रेसचे (ncp) बडे नेते तथा माजी मंत्री नवाब मलिक (navab malik ) यांना शुक्रवारी अखेर जामीन मिळाला. सर्वोेच्च न्यायालयाने (Supreme Court) प्रकृतीच्या कारणास्तव त्यांना 2 महिन्यांसाठी हा तात्पुरता दिलासा दिला.
नवाब मलिक गत फेब्रुवारी 2022 पासून तुरुंगात होते. त्यांनी मुंबई उच्च न्यायालयात जामिनासाठी याचिका दाखल केली होती. पण हाय कोर्टाने त्यांची याचिका धुडकावून लावली होती. त्याविरोधात त्यांनी सुप्रीम कोर्टात धाव घेतली. त्यावर शुक्रवारी सुनावणी झाली. त्यात अंमलबजावणी संचालनालयाने (ईडी) (ed) त्यांच्या जामिनावर कोणतीही हरकत घेतली नाही. परिणामी, न्यायमूर्ती अनिरुद्ध बोस व न्यायमूर्ती बेला एम त्रिवेदी यांच्या द्विसदस्यीय खंडपीठाने त्यांना जामीन मंजूर केला.
मलिक यांची एक किडनी निकामी
नवाब मलिक यांची एक किडनी निकामी झाली आहे. त्यांच्यावर कुर्ला येथील क्रिटी केअर रूग्णालयात उपचार सुरू आहेत. त्यांनी आपल्या याचिकेत किडनी प्रत्यारोपणासाठी वैद्यकीय जामिन देण्याची विनंती केली होती. कोर्टाने त्यांची विनंती मान्य करत त्यांना 2 महिन्यांसाठी तात्पुरता वैद्यकीय जामीन मंजूर केला.
नवाब मलिकांना अटक का झाली होती?
नवाब मलिक यांना 23 फेब्रुवारी 2022 रोजी अटक करण्यात आली होती. तेव्हापासून ते तुरुंगात होते. ईडीने या प्रकरणी अनेक ठिकाणी छापेमारी केली होती. नवाब मलिक यांच्यावर अंडरवर्ल्ड डॉन दाऊद इब्राहिमची बहीण हसिना पारकर हिच्याकडून कुर्ल्यातील गोवा कंपाऊंडची 3 एकर जमीन खरेदी केल्याचा आरोप आहे. बाजारभावानुसार ही जमीन सुमारे 300 कोटींची होती. पण मलिक यांना ती अवघ्या 55 लाख रुपयांत मिळाल्याचा आरोप आहे.
नेमके प्रकरण काय?
उपमुख्यमंत्री देवेंद्र फडणवीसांनी नोव्हेंबर 2021 मध्ये राष्ट्रवादी काँग्रेसचे नेते आणि मंत्री नवाब मलिकांवर गंभीर आरोप केले होते. फडणवीस म्हणाले होते की, मलिकांच्या कंपनीने अशा लोकांकडून जमीन खरेदी केली आहे, जे 1993 च्या मुंबई ब्लास्टमध्ये आरोपी आहेत. ही जमीन दाऊद इब्राहिमशी संबंधीत आहे. तसेच नवाब मलिकचे अंडरवर्ल्डशी संबंध असल्याचा आरोपही करण्यात आला आहे. त्यानंतर ईडीने मनी लाँड्रींगप्रकरणीही नवाब मलिकांवर गुन्हे दाखल करत त्यांची कोट्यवधींची संपत्ती जप्त केली आहे.
मलिकांची ही संपत्ती ईडीकडून जप्त
कुर्ल्यातील गोवावाला कंम्पाऊंड जप्त
कुर्ला पश्चिमेतील व्यावसायिक जागा ईडीकडून जप्त
उस्मानाबादमधील मलिकांची 148 एकर जमीन जप्त
कुर्ला पश्चिमेतील 3 फ्लॅट्स जप्त
वांद्रे पश्चिमेतील 2 राहती घरेही ईडीकडून जप्त
