मुंबई : भारतीय अर्थव्यवस्थेसाठी एक आनंदाची बातमी आहे. यूएस रेटिंग एजन्सी फिचने चालू आर्थिक वर्ष 2023-24 साठी भारताच्या GDP वाढीचा अंदाज 6.3 टक्के ठेवला आहे. याआधी फिचने जीडीपी ६ टक्के राहील असे म्हटले होते. जानेवारी-मार्च तिमाहीतील चांगला विकास दर पाहता फिचने चालू आर्थिक वर्षासाठी भारताच्या GDP वाढीचा अंदाज वाढवला आहे. मागील आर्थिक वर्ष 2022-23 मध्ये भारताचा विकास दर 7.2 टक्के होता. 2021-22 मध्ये देशाची अर्थव्यवस्था 9.1 टक्के दराने वाढली.
अर्थव्यवस्था मजबूत
फिचने सांगितले की, भारतीय अर्थव्यवस्था मोठ्या प्रमाणावर मजबूत आहे. 2023 च्या जानेवारी-मार्चच्या पहिल्या तिमाहीत वार्षिक आधारावर 6.1 टक्के वाढ झाली आहे. अलीकडच्या काही महिन्यांत वाहनांची विक्री चांगली झाली आहे. याशिवाय पीएमआय सर्वेक्षण आणि क्रेडिट वाढ देखील मजबूत आहे. परिणामी, आम्ही चालू आर्थिक वर्षासाठी आमचा विकासाचा अंदाज 0.3 टक्क्यांनी वाढवून 6.3 टक्के केला आहे.
अंदाज घटवला
मार्चच्या सुरुवातीस, फिचने उच्च चलनवाढ आणि उच्च व्याजदर आणि कमकुवत जागतिक मागणीचा हवाला देत 2023-24 साठी भारताचा वाढीचा अंदाज 6.2 टक्क्यांवरून 6 टक्क्यांवर कमी केला. 2024-25 आणि 2025-26 मध्ये भारतीय अर्थव्यवस्था 6.5 टक्क्यांच्या दराने वाढेल, असे फिचने म्हटले आहे.
जीडीपी वाढ अपेक्षेपेक्षा जास्त
अर्थव्यवस्थेच्या वाढीमुळे महागाई कमी झाली असून देशांतर्गत अर्थव्यवस्थेने वेग घेतला असल्याचे फिचने आपल्या अहवालात म्हटले आहे. फिचने सांगितले की जानेवारी-मार्च जीडीपी वाढ अपेक्षेपेक्षा जास्त झाली आणि उत्पादन क्षेत्राने सलग दोन तिमाहीत झालेल्या घसरणीतून सावरले. बांधकाम आणि कृषी उत्पादनात वाढ झाली आहे. खर्चाच्या बाबतीत, देशांतर्गत मागणी आणि निव्वळ व्यापारातील वाढीमुळे जीडीपी वाढ झाली.
