मुंबई : मराठा आरक्षण ( arakshan) हा मुद्दा घेऊन मनोज जरांगे पाटील २९ ऑगस्टपासून उपोषण आंदोलन ( andolan) करत आहेत. मनोज जरांगे ( manoj jarange)पाटील यांना मंगळवारी (१२ सप्टेंबर) या दिवशी उपोषण मागे घेण्याचीही विनंती करण्यात आली. त्यानंतर दुसऱ्याच दिवशी एक व्हिडीओ व्हायरल झाला. ज्यामध्ये मुख्यमंत्री एकनाथ शिंदे ( eknath shinde), उपमुख्यमंत्री देवेंद्र फडणवीस ( devendra fadanvis) आणि उपमुख्यमंत्री अजित पवार ( ajit pawar)दिसत आहेत. मुख्यमंत्री शिंदे त्यात असं म्हणतात की आपण बोलून मोकळं व्हायचं. याविषयीच्या बातम्या समोर आल्यानंतर मुख्यमंत्री एकनाथ शिंदेंनी ट्विट करून एक आपलं म्हणणं मांडलं आहे. तसंच व्हिडीओ व्हायरल करणाऱ्यांचा निषेध केला आहे. ( shivsena)
काय म्हटलं आहे एकनाथ शिंदेंनी?
मराठा आरक्षणविषयक सर्वपक्षीय बैठकीनंतर सह्याद्री अतिथिगृह येथे पत्रकार परिषदेपूर्वी आपला आणि उपमुख्यमंत्री देवेंद्र फडणवीस, अजित पवार यांचा माईकवरील संवाद ‘सोशल मीडीया’वरून चुकीच्या पध्दतीने संपादित करुन फिरविणे अत्यंत खोडसाळपणाचे आहे.
मराठा आरक्षणाबाबत सरकार सुरुवातीपासून संवेदनशील असून कायद्याच्या चौकटीत बसेल असे आरक्षण देण्याबाबत सरकार प्राधान्याने काम करीत आहे. तसेच मराठा आरक्षणाबाबत पहिल्यांदाच अशा सर्व पक्षांच्या नेत्यांना एकत्र बोलावून या विषयी त्यांचे एकमत घेण्यात आले आहे. शासनाने इतकी चांगली भूमिका घेतली असतांना मुद्दामहून काही विरोधक खोडसाळपणे आणि व्हिडीओ क्लिप चुकीच्या पद्धतीने संपादित करून लोकांच्या मनात गैरसमज पसरविण्याचे काम करीत आहेत हे अतिशय निंदनीय आहे. आमच्या एकमेकांमधील संवादाची मोडतोड करून संपादित करून दाखवून या घटकांनी जाणीवपूर्वक निंदनीय कृत्य केले आहे. शासन एकीकडे या संवेदनशील विषयावर ठोस भूमिका आणि निर्णय घेत आहे. अशा पार्श्वभूमीवर समाजात सोशल मीडियातून गैरसमज निर्माण करण्याचा कृत्याचा निषेध करावा तेवढा कमीच आहे.
