नागपूर : 94.3 मायएफएम (my f.m.) या लोकप्रिय खासगी रेडिओ वाहिनीतील ख्यातनाम आर. जे. राजन (R. J. Rajan) उपाख्य राजेश अलोणे (49 वर्षे ) यांचे शनिवार 26 रोजी सकाळी हृदयविकाराने (heart disease) निधन झाले. दररोज सकाळी “माय एफएम का बडा राजन’ अशी प्रसन्न आवाजात साद घालत नागपूरकरांना गुडमॉर्निंग करणारा हरहुन्नरी, हसतमुख रेडिओ जॉकी राजन हा शनिवारी जगाला कायमचा गुडबाय करीत अनंताच्या प्रवासाला निघून गेला. “माहोल मार्निंग’, “पुरानी जिन्स’ व “चाँदनी राते’ हे त्यांचे लोकप्रिय शो होते. “माहोल मार्निंग’मध्ये “माय एफएम का बडा राजन’ ही त्यांची स्वत:ची ओळख श्रोत्यांमध्ये लोकप्रिय होती. त्यांच्या मागे पत्नी, आई आणि एक मुलगा व एक मुलगी असा आप्त परिवार आहे.
शो लोकप्रियतेच्या शिखरावर असतानाच राजनने अशी अचानक एक्झिट घेतल्याने रेडिओ आणि माध्यम जगताला जबर धक्का बसला आहे. राजनचा मृत्यू हृदयविकाराच्या तीव्र धक्क्याने झाल्याची प्राथमिक शक्यता डॉक्टरांनी व्यक्त केली आहे. शनिवारी सकाळी आर. जे. राजन यांचा “माहोल मार्निंग’ हा शो होता. त्या शोची लिंक त्यांनी घरून पाठवली आणि काही वेळेतच त्यांच्या पत्नीने त्यांची तब्येत खराब असल्याचा फोन केल्याने त्यांच्या ऐवजी आर. जे. आमोद देशमुख यांनी हा शो होस्ट केला. आर. जे. राजन यांनी डोके दुखत असल्याची तक्रार केल्याने घरच्यांनी त्यांना न्यूराॅन हाॅस्पीटलमध्ये भरती केले. तिथे ब्रेन हॅमरेज तसेच हृदयविकाराचा झटका आल्याने त्यांचे क्षणार्धात निधन झाले. त्यांच्या निधनाचे वृत्त कळताच सर्व सहकाऱ्यांनी न्यूराॅन हाॅस्पीटलमध्ये धाव घेतली.
राजन मृत्यू झालेला दुसरा आर. जे.
यापूर्वी 21 ऑक्टोबर 2016 रोजी रेडिओ जॉकी शुभम केचे याचे शो होस्ट करीत असताना हृदयविकाराने निधन झाले होते. ‘लाइफ में हो झोलझाल तो शुभम को बोल डाल’, अशी नागपूरकर तरुणांना मनस्वी साद घालत शुभम ‘हाय नागपूर’च्या शोची सुरुवात करायचा. सकाळी 7 वाजता त्याचा शो रेडिओ मिर्चीवरून प्रसारित व्हायचा. मृत्यूपूर्वी त्याच्या ‘हाय नागपूर’ या कार्यक्रमाचे प्रसारण होते. त्यासाठी तो नेहमीप्रमाणे सातच्या आत रेडिओ मिर्चीच्या कार्यालयात आला होता.
