धुळे : अमळनेर बडोदा बस वाहक आणि धुळे आगार व्यवस्थापकांच्या सर्तकतेनंतर धुळे शहरातील पोलिसांनी तत्परता दाखवित बसमधून अमळनेरला ताब्यात घेत त्याच्याकडे असलेल्या तब्बल 700 बाटल्या देशी दारूच्या जप्त पोलिसांनी केल्या. ह्या दारूच्या बाटल्या तांदळाच्या साळमध्ये लपवून सुरत येथील प्रवीण पाटील नामक इसम हा अमळनेरहुन सुरतला या दारूच्या बाटल्या घेऊन जात होता. बस वाहकाला या बस मध्ये ठेवलेल्या गोण्यांवर संशय आल्यामुळे हा सर्व प्रकार उघड झाला आहे.
धुळे मध्यवर्ती बसस्थानकात आज दुपारच्या सुमारास अमळनेर- बडोदा बसवरील (क्रं. एमच-२० बीएल २५३४) बसमधील एक प्रवासी हा सोबत ४ गोण्यांमध्ये काहीतरी संशयास्पद स्थितीत सुरत येथे घेवुन जात असल्याचे लक्षात आल्याने वाहकाने ह्या बाबत माहीती आपल्या आगार व्यवस्थापकांना सांगितली. त्यांनी तात्काळ ही बस धुळे बस डेपोत घेऊन जात तिथल्या अधिकाऱ्यांना हा सर्व प्रकार सांगितला. त्यांनी लगेचच बस स्थानकात ड्युटीवर असलेले पोलिस हवालदार ज्ञानेश्वर साळुंके व पोलिस नाईक वैभव वाडीले यांना ही माहिती दिली. त्यांनी घटनेची माहिती धुळे शहरातील पोलीस निरीक्षक आनंद कोकरे यांना माहिती दिल्याने निरीक्षक आनंद कोकरे यांनी तत्काळ शोध पथकातील कुंदन पटाईत, महेश मोरे, मनिष सोनगिरे, गुणवंत वाघ यांना धुळे बस डेपोत पाठवून सदर दारू घेऊन जाणाऱ्या इसमास ताब्यात घेण्याचे आदेश दिले.
धुळे शहरातील पोलीस ठाण्याचे पथक घटनास्थळी दाखल होऊन त्यांनी सुरत येथील प्रवाशी प्रवीण पाटील या दारू तस्कऱ्याला ताब्यात घेऊन त्याच्या सामानाची चौकशी केली असता त्याने चार तांदळाच्या गोण्यांमध्ये साळ लपवून ठेवलेल्या तब्बल 700 बाटल्या या अंमळनेरहुन सुरतला विक्री करण्यासाठी घेऊन जात असल्याचे कबूल केले. पोलिसांनी सदर प्रवीण पाटील याला पोलीस ठाण्यात आणत त्याच्याकडून 25 हजार रुपयांचा मुद्देमाल जप्त केला असून त्याच्यावर गुन्हा दाखल करून कारवाई करीत असल्याची माहिती धुळे शहरातील पोलिसांनी यावेळी दिली. या कारवाईत पोलिसांनी मोठा मुद्देमाल जप्त केला आहे.
